الثلاثاء 19 نوفمبر 2019 م 11:59 صـ 21 ربيع أول 1441 هـ
الرئيسية | مساحة حرة

الملوخية والعقل الزفتاوى

2019-10-29 15:11:28
فرشوطى محمد

الواد زعبوله عمال يصرخ فى الكَفْرُ كله ويقول : الملوخية هى السبب يا خويا.....الملوخية هى السبب ياخلق هوه.....
قلت وانا اقترب منه: دا "جدر البطاطا هو السبب يا ضنايا"
قال : المره دى الملوخية هى السبب ياعم فرشوطى!
قلت باهتمام :دا فيلم جديد ده ولا أيه ياواد يازعبولة؟
قال: يوووووووه دى مصيبة كبيرة قوى ياعم فرشوطى
قلت متسائلا :مصيبة ايه دى ياوله؟
رد زعبولة ونبرة الحزن فى صوته :الواد سعد قتل محاسن مراته ياعم فرشوطى
نهارك اسود يازعبوله .... قتلها فين وازاى يابوز الأخس؟
قال : فى قرية دهتورة ياعم فرشوطى ؟
قلت: الله يخرب بيتك “ما تفوق يا ابني إنت واكل تاتورة؟” ....هى فين دهتورة دى؟
ضرب كفا على كف ووضع يده على جبهته وقال ضاحكا: حلوة - حلوة - تاتورة ودهتورة تنفع اغنية ياعم فرشوطى
قلت صارخا ماتقول ياوله جك حش وسطك - هى فين تاتورة ولا دهتورة دى
وبصوت مرتفع قال : دى فى زفتى ياعم فرشوطى- فى زفته!
قلت :نهار ابوك زفت وقطران مغلى أية الحكاية يابن الـ......
قال : ياعم فرشوطى قرية دهتورة دى تابعة لمركز زفتى
امسكت بتلابيبه وانا اصرخ انت عايز تنقطنى زفتى دى فين ياقطران
قال وهو يقع على ظهره من شدة الضحك دى تبع طنطا شالله ياشيخ العرب - اروح اجيب لك شويه حمص ياعم فرشوطى؟
قلت : ما تقول كدا من الصبح - وايه بقى اللى خلى سعد يقتل محاسن هناك؟
قال : الملوخية
قلت : ازاى ياوله؟
قال: الحاج سعد قبل مايروح الشغل طلب من خلتك محاسن تطبخ له ملوخية ولما رجع الضهر يتغدى لقى زوجته طبخه باميه ....
قلت : وايه المشكلة ملوخية بامية كله أكل
قال: لأ مش كله أكل فيه فرق بين البامية والملوخية وعلشان كده سعد زعل قوى واتخانق مع مراته محاسن وبقت فضيحة - سعد اتنرفز وراح جايب المسدس وقتل زوجته محاسن
قلت :وماتت مراته علشان الملوخية يازعبولة؟
قال: ايوه ياعم فرشوطى قتلها و حاول الانتحار، قبل أن يتم القبض عليه.
قلت : امال لوكانت خبيزة كان ايه اللى حصل ؟
قال زعبوله:كانت البلد ولعت كلها.
فرشوطى محمد صحفى ساخر

0
مساحة حرة
150459
جميع الحقوق محفوظة © 2019 - جريدة شباب مصر