شوية طلاب عملوا حاجة إسمها Rescale ... كانوا مائة طالب ... الهدف الإرتقاء بالفن والثقافة ومواجهة إنحدارهم ... وتنمية المواهب وتسليط الضوء عليها ... من غير فذلكه ... من غير فلسفة ... من غير صداع وسفسفطة غرف مغلقة ... بعيدا عن التقعر اللى مالوش لازمة ... وتحركوا ... ونجحوا ... كل ذلك حدث فى مواجهة فشل وإنهيارات أحزاب وحركات وإئتلافات ... إبتعد هؤلاء الشباب الرائعيين عن الاضواء والإعلام وعملوا فى صمت ... إستخدموا التكنولوجيا ومواقع التواصل الإجتماعى لتوصيل رسالتهم ... ونجحوا... 
بس ... هى دى حدوتة تجمع شبابى إسمه Rescale 
ليس هذا فحسب ... بل يوم الإثنين القادم وتحديدا فى قصر الأمير طاز بالسيدة عائشة الإثنين القادم سوف يعقدون لقاء وتحرك جديد لعمل مقارنة بين الفن فى العصر السابق والفن فى العصر الحالى .. 

ويوم الإثنين القادم الموافق 6 فبراير الجارى وفى قصر الأمير طاز الثقافى بالسيدة عائشة يبدأون تحرك جديد ونشاط آخر من خلال عمل مقارنة بين الفن في العصر السابق و الفن في عصرنا الحالي وذلك بعرض سلبيات و إيجابيات كليهما . 
ليس هذا فحسب 
بل سينظمون فقرات ترفيهية لمواهب تم الإرتقاء بها عن طريق ورش عمل ولقاءات ومحاضرات بحضور شخصيات عامة ... 
مائة طالب نجحوا فى أن يفعلوا مافشلت فيه وسائل إعلام وأجهزة ومؤسسات رسمية فى الدولة 
مائة طالب نجحوا فى أداء دور كان من المفروض أن تقوم به وزارة الثقافة بكل مؤسساتها لكنها مع الأسف لم تفعل  
على صفحتهم على الفيس بوك تجد مقارنة جميلة وهادية وحلوه بين الفن القديم والمعاصر ... 
لم يسقطوا فى هوه المقارنات الكلاسيكية المعروفة بل طرحوا المقارنة بأسلوب شبابى رشيف ... عجبتنى طريقة العرض بشكل غير عادى .. وهاهو جزء مما كتبوه : 
---------------------
- تعرف اغنية لعمرو دياب بيقول فيها "ليلي نهاري تعالى حبيبي لا ملامه حبيبي خدني ليك" ؟ ☺
= اها مالها !!
- اسمها ايه ؟ 
= اسمها ليلى نهارى ..
- طب فى اغنية تانية لام كلثوم بتقول "ليلى نهارى فكرى بيك مشغول و حياتى لك وحدك و لك علطول" اسمها ايه ؟
= اسمها ليلى نهارى برضو !! 
- ...
فعلا ام كلثوم و عمرو دياب غنوا اغنية بنفس الاسم لكن طبعا مع اختلاف اللحن و الكلمات و الاسلوب و كل حاجه تقريبا 

اللى بنقولوا ان الفن المصرى على مر العصور لم يفقد هويته الاساسية او مصريته  لكن مع التطوير و تشكل المجتمع بالاساليب الجديدة فى كل المجالات كان لازم الفن كمان يتطور و يتحدث عشان يلاءم التكنولوجيا .. 
لو جينا نشوف المسارح اللى كان بيتقدم عليها وصلات غناء و رقص شرقى فى الخمسينات مبقتش موجودة ،
و السينما 3d و simulator مكنتش موجودة زمان ، التماثيل المشهورة زى نهضة مصر و اسد قصر النيل و كل المنحوتات دى قديمة و تقريبا فن النحت اندثر دلوقتى ، الاغانى المستقلة اللى بتناقش مشاكل المجتمع زى اغانى كايروكى و مسار اجبارى مكنتش موجودة زمان برضو ..
تلخيصا للاختلاف بين العصرين الفن المصرى طول عمره بيقدم المجتمع بشكل ما على المسرح او فى شاشة السينما او على شكل رسمة او صورة بمعنى ان الاختلاف مش فى الجوهر ..
طب يا ترى انهى كان احسن ؟! الفن القديم ولا الحديث .. 
طب م بدل م نتكلم Rescale هتورينا الفرق ده على مسرح قصر الامير طاز 
يوم 6 فبراير ان شاء الله ..
عشان تعرف توصلنا اركب المترو و انزل محطة محمد نجيب و اركب عربيات السيدة عائشة و تقول للسواق نزلنى عند سبيل ام عباس  و ابقا قول للسواق كل شوية عشان بينفضوا 
القصر فى شارع السيوفية 
مستنيكوا من الساعة 3 ان شاء الله ..
ممكن تيجوا بدرى و تاخدوا لفة ف القصر و تتصوروا هناك 
-----------------------
هى دى المقارنة اللى عملها هؤلاء الطلاب الرائعيين ... 
بعيدا عن أى فلسفة لاعلاقة لها بالواقع ... 
إنهم يملكون الحلم 
فقرروا النزول لأرض الواقع دون أى إمكانيات وعلى نفقتهم الخاصة ... فنجحوا ...