بقالي أكتر من سنتين بفكر في السؤال ده على أمل يكون عندي رد واضح أو حتى قناعة تخليني أبطل تفكير أو حتى أكلم نفسي بأستمرار، سواء كانت أجابة منطقية أو لا ..
هو أحنا أمتى بنقدر نتحلل من وعد أخدناه على نفسنا أتجاه شخص معين وتحديداً لو كان قريب مننا
أعتقد أن الموضوع مش بسهولة عدم تنفيذه وخلاص كأنه ما أتقالش زي ما بعض مننا ممكن يتصور، حيرة و متضادات كتيرة جداً بين قلبك و عقلك بين المفروض و اللي مايصحش بين اللي ممكن و الصعب بين السهل و المستحيل بين واقع و حقيقة بين وهم و مبدأ
بين اللي مشاعر قلبك بتحتمه عليك و بين تفكير عقلك بتقبل رفضه التام
بين انه هينفع تتحلل لعدم توفر اسباب البقاء أو الاستمراريه أو وجود بدائل تصبرك على العهد
و بين الانساس اللي جواك و الواذع اللي بيحركك ويخليك تكمل
أوقات كتير بكون في حيرة من أمري .. طيب أحمد ربنا على شوية التربية اللي جوايا ولا أنقمها في ظل المتناقضات اللي حوالينا ؟!
مقياس الاجابة على كل ده هو الشخص اللي جواك تحديداً "أصلك" بمعنى أن الموضوع نسبي جداً وبيختلف من شخص للتاني
على سبيل المثال .. هل ممكن لولد يوعد بنت أكبر منه بالجواز ؟
هنا بتظهر قدامك معارك ملحمية ل أسئله بترد على بعض و كلها صح .. حضرتك متخيل !!
هو مش حرام ولكن ماينفعش
هو يجوز ولكن صعب
هما متمسكين ب بعض ولكن المجتمع هيرفض
هو فيه تفاهم ولكن نظرات الناس ليهم هتخليهم يكرهوا بعض
هو ينفع ولكن يلزم فلوس
هو حلال ولكن الاهل مش هتوافق
هو الحب موجود ولكن مستحيل يستمر
هو الفلوس بتسهل كل حاجه ولكن مش كفيلة لشراء راحتهم وسط المجتمع ده
والخ الخ الخ...
نتفرق هنا لنقطة مهمه اوي .. وهيا أن أحنا اللي بنقرر ايه اللي ينفع وايه لا .. أحنا اللي بنقرر امتى نصبر للاخر و امتى نتخاذل
لما يكون الطرف التاني اللي وعدته قادر يخليك تلتزم بوعدك أو لا ..
قدملي أسباب البقاء و ساعدني أكون قد وعدي وأنا هحترق ليك على أمل أني مش هسببلك خذلان ..
على قد كمية اللي بتقدمه على قد كمية ما هتلاقيه و على قد كمية الحب على قد ما هتلاقي تنفيذ ال وعد.